سندھ حکومت نے خط لکھ کر وفاق سے مطالبہ کیا ہے کہ ٹماٹرکی درآمد پر پابندی اور پیاز کی برآمد کے لئے اقدامات شروع کیے جائیں
تفصیلات کے مطابق سندھ کے وزیر زراعت اسماعیل راہو کی جانب سے وفاقی حکومت کو لکھے گئے خط میں کہا گیا ہے کہ اس سال ملک میں پیاز اور ٹماٹر کی فصلوں کی پیداوار میں صوبہ سندھ پہلے نمبر پر ہے، صوبہ بھر میں پیاز اور ٹماٹرکی فصلوں کی چنائی شروع ہو چکی ہے۔
خط میں لکھا گیا ہے کہ سندھ میں اس سال پیاز اور ٹماٹر کی بہت اچھی پیداوار متوقع ہے، ٹماٹر کی درآمد اور پیاز کی برآمد نہ ہونے کی وجہ سے ان اجناس کی قیمتوں میں زبردست کمی واقع ہوئی ہے، لہٰذا کسان اپنی پیداوار کی مناسب قیمت وصول نہیں کر رہے ہیں
خط میں وفاق پر واضح کیا گیا ہے کہ کسان ٹماٹر کی درآمد پر پابندی لگانے کے لئے سندھ بھر کے کئی شہروں میں احتجاج بھی کر چکے ہیں
وزیر زراعت اسماعیل راہو اپنے خط میں مزید کہا ہے کہ گزشتہ سال 57 ہزار 900 ہیکٹر رقبے پر پیاز کی کاشت ہوئی تھی، جس سے 7 لاکھ 82 ہزار 140 میٹرک ٹن پیداوار ہوئی ہے، جب کہ رواں سال 58 ہزار 200 ہیکٹر پر پیاز کی فصل کاشت کی گئی ہے۔ اسی طرح گزشتہ سال 22 ہزار 542 ہیکٹر پر ٹماٹر کی کاشت کی گئی تھی، جس سے ایک لاکھ 64 ہزار 658 میٹرک ٹن ٹماٹر پیدا ہواتھا۔ رواں سال ٹماٹر کی فصل کی کاشت 30,000 ہیکٹر پر کی گئی ہے
اسماعیل راہو نے خط میں مطالبہ کیا ہے کہ وفاقی حکومتی کی ناقص پالیسی کی وجہ سے مقامی کسانوں کو ان کی فصل کی لاگت بھی نہیں مل رہی۔ ٹماٹر کی درآمد پر پابندی عائد کرنے کے لئے ضروری اقدامات اٹھائے جائیں جب کہ وزارت تجارت اور وزارت فوڈ سیکورٹی پیاز برآمد کرنے کی اجازت دے.
