نزلہ اور زکام کے نتیجے میں ناک کا بند ہونا ایک عام بات ہے، تاہم بعض حالتوں میں زکام کے بغیر بھی ناک بند رہتی ہے، خاص طور پر سوتے وقت ناک کے بند ہونے سے سانس لینے میں کافی دشواری اور الجھن کا سامنا کرنا پڑتا ہے اور نیند بھی نہیں آتی
اس حوالے سے عربی میگزین ’سیدتی‘ میں اہم معلومات پر مبنی مضمون میں نہ صرف زکام کے علاوہ ناک کی بندش کی ان علامات کی نشاندھی کی گئی ہے، بلکہ ان کے علاج کے بارے میں بھی بات کی گئی ہے۔ ذیل میں ہم اپنے قارئین کے لیے ان کا ذکر کر رہے ہیں
1۔ الرجی:
یہ تاثر غلط ہے کہ الرجی صرف موسمِ بہار میں ہی ہوتی ہے بلکہ الرجی کی مختلف اقسام ہیں، آپ موسم خزاں یا سال کے کسی بھی موسم میں الرجی کا شکار ہو سکتے ہیں۔ اس کے لیے اپنی الرجی کے بارے میں آگہی حاصل کر کے اس مسئلے پر قابو پایا جا سکتا ہے
اس حوالے سے مارکیٹ میں کافی ادویات دستیاب ہیں، جو الرجی کی وجہ سے ناک کی سوزش یا اس کے بند ہونے میں مفید ثابت ہو سکتی ہیں
ناک کے بند ہونے کی عام وجوہات میں سوزش کو روکنے والی ادویات جیسے اسپرین آئی بیوبروفین، بلڈ پریشر کو کم کرنے والی دوائیں جیسے بیٹا بلاکرز یا اینٹی ڈپریشن شامل ہیں، استعمال کی جا سکتی ہیں
2۔ پریشانی یا تناؤ:
پریشانی یا ذہنی تناؤ آپ کی صحت پر براہِ راست اثراندز ہوتا ہے۔ ذہنی تناؤ سے سر درد کے علاوہ نیند کی کمی اور متعدد مشکلات کے ساتھ ناک کے بند ہونے کی مشکل بھی پیش آ سکتی ہے
اگر آپ پریشانی میں ناک کے بند ہونے کا شکار ہیں تو گہری سانس لیں اور آہستہ سے سانس کو خارج کریں، یہ عمل متعدد بار دہرائیں، اس سے آپ کو سکون محسوس ہوگا
3۔ ہارمون:
بعض نوعیت کی ہارمونل تبدیلیاں بھی ناک کے بند ہونے کی وجہ ہو سکتی ہیں، جو خواتین میں حمل یا ایام خاص کے دوران ہو سکتی ہیں
اگر ہارمونل تبدیلی کے باعث ناک بند ہے تو کوشش کریں کہ ناک کے لیے بنائی گئی خصوصی اسٹرپس کا استعمال کریں، جو فوری طور پر ناک کو کھول دیتی ہیں
4۔ ناک کے عضلات کا بڑھ جانا:
آئینے میں دیکھیں تاکہ یہ معلوم ہو سکے کہ کہیں آپ کی ناک کے عضلات تو نہیں بڑھ گئے ہیں جس کی وجہ سے ایک جانب سے سانس لینے میں دشواری کا سامنا کرنا پڑ رہا ہو
5۔ ناک کی سوزش:
اگر آپ کی ناک الرجی کی وجہ سے بند نہیں ہوئی تو ممکن ہے کہ کھانسی یا گلے میں بلغم کا جمع ہونا اس کا باعث ہو
یہ وہ متعدد عوامل ہیں جن کی وجہ سے ایسا ممکن ہے، تاہم ان کے علاوہ فضائی آلودگی، بعض پرفیوم، دھواں، یا بعض ادویات بھی اس عمل کا باعث بن سکتی ہیں۔
