فیس بک نے آپ کی پوسٹ پر کسی مخصوص شخص کا تبصرہ یا کمنٹ روکنے کا آپشن پیش کر دیا ہے، یعنی اب آپ پوسٹ کے ساتھ ہی اسے جزوی طور پر طنزیہ جواب، ہراساں کرنے یا غیر ضروری طور پر مداخلت کرنے سے باز رکھ سکتے ہیں
واضح رہے کہ فیس بک پر کھلاڑیوں، اداکاروں اور دیگر مشہور شخصیات نے اس جانب انتظامیہ کی توجہ مبذول کرائی تھی، کیونکہ ان کی پوسٹ پر رنگ، نسل اور دیگر تعصبات کی بنیاد پر ہر شخص نے اپنا منہ اور کمنٹس کا دہانہ کھول رکھا تھا۔ فیس بک نے اب اپنے پلیٹ فارم پر نفرت اور نسل کی بنا پر نازیبا جملوں کو روکنے کا ایک اہم ٹول پیش کر دیا ہے
فیسبک انتظامیہ کے مطابق اس ٹول سے لوگ ایک جانب تو پوسٹ کو تمام افراد، مخصوص افراد یا گروپ کے لیے منتخب کر سکتے ہیں۔ اس طرح یہ پوسٹ وہی دیکھ سکیں گے اور عوامی پوسٹ پر بھی مخصوص افراد کو کمنٹس سے روکا جا سکے گا۔ یہ سہولت پہلے ہی فیس بک کے ایک اور پلیٹ فارم انسٹاگرام پر بھی پیش کی جاچکی ہے
فیس بک نے اپنے اعلامئے میں کہا ہے کہ لوگوں کو ہم نے صارفین کو عوامی پوسٹ پر مزید کنٹرول فراہم کر دیا ہے، ہم پرامید ہیں کہ وہ اپنے مندرجات میں مدد لیتے ہوئے غیرضروری مداخلت کو روک سکیں گے
فیس بک کا مزید کہنا ہے کہ اگر آپ عوامی شخصیت، کوئی تخلیق کار یا کسی برانڈ سے وابستہ ہیں تو آپ بھی کمنٹ کرنے والے افراد کو محدود رکھ سکتے ہیں۔ اس سے آپ کا تحفظ بڑھے گا اور آپ کمیونٹی میں بامعنی گفتگو شروع کر سکیں گے
واضح رہے کہ برطانوی فٹبال کھلاڑیوں کو فیس بک پر ایسے ہی مسائل کا سامنا تھا اور وہ اس پلیٹ فارم سے دور ہوتے جا رہے تھے۔ تاہم کئی کھلاڑیوں نے کہا تھا ان کی پوسٹ پر نسلی منافرت کے کمنٹس روکنے میں فیس بک ناکام رہا ہے۔ اس کے بعد ہی فیس بک نے یہ قدم اٹھایا ہے.
