رمضان المبارک کے دوران نو سربازوں کی جانب سے سوشل میڈیا پر ’رمضان گفٹ‘ کے نام سے کئی جعلی لنک گردش کر رہے ہیں جس کے حوالے سے سائبر سکیورٹی ماہرین نے شہریوں کو خبردار کیا ہے کہ وہ محتاط رہیں اور جعلی لنکس پر کلک کر کے اپنی ذاتی معلومات دینے سے گریز کریں
ماہرین کی جانب بتایا گیا ہے کہ سوشل میڈیا پر گردش کرنے والے ایسے لنک اوپن کرنے پر شہریوں سے ان کی ذاتی معلومات مانگی جاتی ہیں اور پھر ان پوسٹس کو دوسروں کے ساتھ شیئر کرنے کی شرط بھی رکھی جاتی ہے
سائبر سکیورٹی ایکسپرٹس کے مطابق ایسے جعلی لنکس پر کلک کرنے اور اپنی ذاتی معلومات درج کرنے سے اکثر شہری سائبر کرائم کا شکار ہوجاتے ہیں، شہریوں کی ذاتی معلومات لے کر اسے مختلف پلیٹ فارمز پر بیچ دیا جاتا ہے جو مختلف مجرمانہ سرگرمیوں میں استعمال کی جا سکتی ہیں
سائبر سکیورٹی ماہرین کی جانب سے یہ بھی بتایا گیا ہے کہ صارفین کو شکار بنانے کے لئے سائبر کرمنلز آئے دن نت نئے ہتھکنڈے استعمال کرتے ہیں، رمضان المبارک میں اکثر لوگ قرآن پاک اور دیگر اسلامی ایپلیکیشنز موبائل فونز پر انسٹال کرتے ہیں
حال ہی میں گوگل پلے اسٹور نے کچھ ایسی ہی اسلام کا مذہبی پس منظر رکھنے والی ایپلیکیشنز اپنے پلیٹ فارم سے ہٹا دی ہیں، یہ ایپس صارفین کا ڈیٹا اکٹھا کر رہی تھیں یا پھر صارفین کے موبائل میں کوئی وائرس ڈال رہی تھیں
ماہرین نے شہریوں کو رمضان المبارک کے دوران اسلام کا نام استعمال کرنے والی ایسی نام نہاد ایپلیکیشنز انسٹال کرتے ہوئے بھی محتاط رہنے کی ہدایت کی ہے اور ساتھ ہی رمضان گفٹ کے متعلق گردش کرنے والے جعلی لنکس پر کلک کرنے اور اپنی ذاتی معلومات درج کرنے سے اجتناب کرنے کا بھی کہا ہے
ماہرین نے شہریوں کو خبردار کرتے ہوئے کہا ہے کہ شہری ایسے جعلی لنکس دوسروں کے ساتھ ہرگز شیئر نہ کریں ورنہ ان کے خلاف قانونی کارروائی کی جا سکتی ہے، جتنا زیادہ ایسے لنکس شیئر کیے جائیں گے اتنے زیادہ لوگ سائبر کرائم کا شکار ہو سکتے ہیں۔
