تاریخی ادوار کی زمانہِ حاضر کے تحت تشریح کی جاتی ہے تو کبھی اسے خوشگوار بنایا جاتا ہے اور کبھی اسے تاریک کہا جاتا ہے۔
امریکہ چونکہ ایک نیا آزاد ہونے والا ملک ہے اور اس کے ابتدائی دور میں آباد ہونے والے انگلستان سے تعلق رکھتے تھے، اس لیے ان کی تہذیب کی بناوٹ میں انگریزی عناصر شامل ہیں۔ بعد میں یہاں دوسری اقوام کے لوگ بھی آئے۔
خاص طور سے اس کے معاشرے میں اس وقت مزید تبدیلی ہوئی، جب یہاں پر افریقہ سے غلاموں کو لایا گیا۔ اس عمل نے رنگ کی بنیاد پر معاشرے کو تقسیم کر دیا اور سفید فام لوگوں کو کالے لوگوں پر فوقیت دی گئی۔
امریکہ کے بانیوں نے اس بات پر زور دیا کہ اینگلو سیکسن نسل کے لوگ دوسری قوموں سے زیادہ اعلیٰ و افضل ہیں۔ اس نظریے کی بنیاد انہوں نے یورپی عہدِ وسطیٰ کی تاریخ پر رکھی۔ ٹامس جیفرسن نے اس نظریے کی توثیق کی اور بار بار یہ اعلان کیا کہ امریکہ میں اینگلو سیکسن تہذیب اور کلچر کی بنیاد ہونی چاہیے۔
اس مقصد کے حصول کے لیے اس نے ورجینیا یونیورسٹی میں قدیم انگلش کا شعبہ کھولا۔ جب جنوب کے علاقے میں مزید یونیورسٹیاں قائم ہوئیں تو ان سب نے عہدِ وسطیٰ کی تاریخ اور قدیم انگریزی پڑھانا شروع کیا۔
اس مطالعے کے نتیجے میں یہ کہا گیا کہ اینگلو سیکسن کی نسل کی اپنی تاریخ ہے اور ان کا شاندار ماضی بھی ہے، جبکہ افریقی، امریکی نسل کے لوگوں کی نہ تو کوئی تاریخ ہے اور نہ ہی ان کا کوئی ماضی ہے۔ اس لیے یہ افریقی لوگ غلام بن کر امریکہ آئے اپنی تاریخ اور ماضی سے کٹ گئے۔ اس لیے یہ بحیثیت انسان کم تر درجے پر ہیں۔
امریکہ کی خانہ جنگی کے بعد جب غلامی کا خاتمہ ہوا تو جنوب میں بسنے والے امریکیوں نے اس کو ذہنی طور پر قبول نہیں کیا اور وہ عہدِ وسطیٰ کی تاریخ اور ماضی میں ڈوب کر اپنے مسائل کا حل اس میں تلاش کیا۔ مثلاً کلو کلکس کلان، جو سفید فاموں کی ایک دہشت گرد تنظیم تھی اور آزاد ہونے والے افریقی غلاموں کے خلاف تھی۔
اسے وہ عہدِ وسطیٰ کے نائٹس کا درجہ دیتے تھے جو اعلیٰ اخلاقی اقدار کے پابند تھے اور جنگ کرنا ان کا پیشہ تھا۔ اس بنیاد پر وہ سفید فام لوگوں کو افریقی، امریکی کے مقابلے میں ترجیح دیتے تھے۔
اس دلیل کا جواب افریقی، امریکی، دانش وروں نے دیا۔ ان کا کہنا تھا کہ عہدِ وسطیٰ میں اینگلو سیکسن کا سماجی درجہ نورمن کے مقابلے میں کم تر تھا۔ کیونکہ 1012 میں فرانس کے ولیم نے انگلستان کے بادشاہ کو شکست دے کر ملک پر قبضہ کیا تو اینگلو سیکسن شکست کھا کر ان کے ماتحت ہو گئے۔
نورمن حکومت نے ان لوگوں سے محنت مزدوری کرائی اور انہیں اپنے تسلط میں رکھا۔ اس لیے عہد وسطیٰ کی تاریخ اور ماضی میں ان کا کوئی اعلیٰ مقام نہیں ہے۔ یہ تاریخ کی غلط تشریح کر کے اس کو اپنے حق میں استعمال کر رہے ہیں۔
افریقی دانشوروں کی ایک دلیل یہ بھی تھی کہ سفید فام نسل پرستی کی بنیاد عہد وسطیٰ میں نہیں پڑی تھی اور یہ اصطلاح نوآبادیاتی دور میں شروع ہوئی اور امریکہ میں اس کو افریقہ سے لائے گئے غلاموں کو کم تر سمجھنے کے لیے اسے استعمال کیا گیا۔
افریقی، امریکی دانشوروں نے اپنے مساوی سماجی مقام کو حاصل کرنے کے لیے یہ دلیل بھی دی کہ ان کی اپنی تاریخ بھی ہے اور ماضی بھی۔ انہیں اس سے محروم کرنے کا جرم سفید فام قوم جس نے نہ صرف انہیں اپنے خاندانوں سے جدا کیا، بلکہ اپنے ملک اور قبائل سے بھی علیحدہ کیا، لیکن اب وہ اپنی تاریخ اور ماضی کو نہ صرف افریقہ میں تلاش کرتے ہیں، بلکہ امریکہ کی سرزمین میں بھی ان سے جڑی ہوئی ہے۔
بوبوا نے اپنی تحریروں اور سیاسی تحریکوں کے ذریعے سفید فام نسل کے نظریے کی متھ کو توڑا اور اس پر بھی تنقید کی کہ امریکہ میں اینگلو سیکسن کو اپنی برتری جتانے کا کوئی حق نہیں ہے۔
اگرچہ اینگلو سیکسن نے عہدے وسطیٰ کی تاریخ کو اپنا ماڈل تو بنایا مگر تاریخ کے ان حصوں کو اپنایا جو ان کے مفادات کو پورا کرتے تھے۔ اس میں ان کی مذہبی انتہا پسندی بھی ہے اور نہ انصافی کے جذبات بھی ہیں۔ امریکہ کے جنوب میں خاص طور سے مذہبی رنگ و نسل کا تعصب بہت گہرا ہے۔
اگرچہ قومیں ماضی کو واپس لانے کی کوشش تو کرتی ہیں مگر ماضی دور حاضر میں کبھی واپس نہیں آتا ہے اور اگر آتا بھی ہے تو اس کی شکل مسخ ہوتی ہے۔
اینگلو سیکسن نسل کی برتری نے امریکہ میں آباد دوسری یورپی اور ایشیائی آباد لوگوں کو بھی ان کی تاریخ اور کلچر سے جدا کر کے انہیں کم تر بنا دیا ہے۔ یہ امریکی قوم کا ایک المیہ ہے کہ وہ اب تک اپنے تہذیبی رشتے انگلستان میں ڈھونڈتے ہیں۔
بشکریہ انڈپینڈنٹ اردو
