آن لائن رابطے کے بعد عشق میں گرفتار نوجوان لڑکی پاکستان کی سرحد سے فرار ہو کر غیر قانونی طور پر بھارت آئی اور اب پولیس کی مہمان بن گئی ہے
بھارت کے جنوبی شہر بنگلور کی پولیس نے ایک روز قبل ایک انیس سالہ پاکستانی لڑکی کو اپنی شناخت کے ساتھ جعلسازی کرنے اور شہر میں غیر قانونی طور پر رہنے کے الزام میں گرفتار کیا ہے
پولیس حکام کے مطابق وہ اپنے بھارتی عاشق سے ملاقات کے لیے نیپال کے راستے غیر قانونی طور پر بھارت میں داخل ہوئی تھیں
بھارتی حکام نے ان کی شناخت اقرا جیوانی کے نام سے کی ہے، جن کے مطابق مذکورہ لڑکی گزشتہ برس بھارت اور نیپال کے درمیان کھلی سرحد کے ذریعے بھارت میں داخل ہوئی تھیں
بنگلور کے ڈپٹی کمشنر آف پولیس وائٹ فیلڈ کے مطابق چھبیس سالہ ملائم سنگھ یادو نامی شخص، جس نے اقرا کو بھارت آنے کی دعوت دی، اصل میں یوپی کا رہنے والا ہے، اور شہر کی ایک پرائیویٹ کمپنی میں سکیورٹی گارڈ کے طور پر کام کرتا تھا
پولیس کے مطابق ”گزشتہ برس اس کا ایک انیس سالہ لڑکی سے گیمنگ ایپ لوڈو کے ذریعے رابطہ ہوا تھا، جس کا تعلق پاکستان کے صوبہ سندھ کے شہر حیدر آباد سے ہے۔ دونوں شادی کرنے کا ارادہ رکھتے تھے، اسی لیے اس شخص نے لڑکی کو ستمبر 2022ع میں نیپال کے کھٹمنڈو کے راستے سے بھارت آنے کے لیے کہا تھا“
پولیس کا مزید کہنا ہے کہ وہ بنگلور کے بیلندور پولیس اسٹیشن کی حدود میں لیبر کوارٹرز میں رہتے تھے۔ اب اس لڑکی کو غیر ملکی رجسٹریشن آفس (ایف آر آر او) کے حوالے کر دیا گیا ہے۔ اس شخص کے خلاف بھی مقدمہ درج کیا گیا اور اسے بھی گرفتار کر لیا گیا ہے
پولیس کے مطابق اقرا چند ماہ قبل نیپال پہنچی تھی، جہاں ملائم سنگھ یادو بھی گیا اور دونوں نے وہیں پر شادی کر لی۔ شادی کے بعد یہ بھارت نیپال سرحد عبور کر کے پہلے ریاست بہار پہنچے
کچھ دن بعد ملائم سنگھ یادو اقرا جیوانی کو بنگلورو لے آیا اور یہاں وہ کرائے کے ایک مکان میں رہنے لگے۔ یہاں تک کہ ملائم نے اقرا جیوانی کا نام بدل کر راوا یادو کر دیا
وہ اقرا کو ہر جگہ اپنی اہلیہ کے طور پر متعارف کرواتا اور اس طرح اس نے اپنی نئی نویلی دلہن کے لیے ایک آدھار کارڈ (بھارت کا قومی شناختی کارڈ) بھی حاصل کر لیا۔ اس کے بعد انہوں نے بھارتی پاسپورٹ کے لیے بھی درخواست دی
اطلاعات کے مطابق اقرا جیوانی پاکستان میں اپنے خاندان کے افراد سے رابطہ کرنے کی کوشش کر رہی تھی اور اس طرح ان کی اصل شناخت سامنے آ گئی
پاکستان میں اپنے اہل خانہ سے رابطے کی کوشش کے دوران بھارتی انٹیلیجنس بیورو نے انہیں پکڑا اور اس بارے میں ریاستی انٹیلیجنس حکام کو آگاہ کر دیا
اسی اطلاع کی بنیاد پر سٹی پولیس نے جوڑے کے بارے میں تفصیلات جمع کرنی شروع کر دیں اور ان کے گھر پر چھاپہ مارا گیا۔ پولیس کا کہنا ہے کہ ان سے پوچھ گچھ کے بعد انہیں گرفتار کر لیا گیا۔ اطلاعات کے مطابق اس سلسلے میں مکان مالک کو بھی گرفتار کیا گیا ہے
دوسری جانب بھارتی ذرائع ابلاغ کا کہنا ہے کہ پولیس کے لیے بڑا سوال یہ ہے کہ بہار کے بیر گنج بارڈر سے ہندوستان میں داخل ہونے والا جوڑا بارڈر سیکورٹی کو نظرانداز کرکے ملک میں کیسے داخل ہونے میں کامیاب ہوا۔ پہلے ہی سنٹرل انٹیلی جنس ڈپارٹمنٹ، آئی ایس ڈی اور دیگر تحقیقاتی ایجنسیاں اس واقعے کی معلومات حاصل کر رہی ہیں
لڑکی سے پوچھ گچھ کے دوران ایک دلچسپ کہانی سامنے آئی ہے۔ لڑکی نے بتایا ہے کہ کورونا لاک ڈاؤن کے دوران دونوں کے درمیان محبت ہوئی۔ شادی سے پہلے تین سال تک ان کی محبت تھی۔ 2020ع کے آغاز میں اقرا اور ملائم سنگھ کی محبت کی کہانی شروع ہوئی۔ 2020 میں شادی کرنے کا فیصلہ کیا۔ اقرا نے 2021 میں پاکستان چھوڑ دیا تھا۔ بعد ازاں وہ سیاحتی ویزے پر پاکستان سے دبئی آئی اور دبئی سے نیپال آئی۔ اس سب کے بعد عاشق یوں پرواز کر کے نیپال چلا گیا جیسے اس کی گرل فرینڈ نیپال میں داخل ہو رہی ہو۔ نیپال میں شادی کرنے کے بعد یہ محبت کرنے والے غیر قانونی طور پر سرحد پار کرکے بہار کے راستے بھارت میں داخل ہوئے۔ نوجوان خاتون کے بھارت آنے کا سارا خرچ اس کے عاشق نے اٹھایا
فی الحال بیلندور پولیس ملائم سنگھ یادو کو اپنی تحویل میں لے کر بارڈر کراسنگ کی مکمل تفتیش کی جا رہی ہے۔ قومی تحقیقاتی ایجنسی نے اس سلسلے میں ملائم سنگھ یادو سے پوچھ گچھ کرنے کی بھی تیاری کر لی ہے۔ بیلندور پولیس نے کئی جہتوں میں تفتیش کی ہے۔
