بھارتی ٹیلی ویژن انڈسٹری کے معروف اداکار ویویان ڈیسینا نے انکشاف کیا ہے کہ انہوں نے پانچ سال قبل اسلام قبول کرلیا تھا
بھارتی میڈیا رپورٹس کے مطابق ویوین ڈیسینا کافی عرصے سے اسپاٹ لائٹ سے دور تھے کیونکہ ان کے بارے میں کوئی خبر نہیں تھی اور وہ ڈراموں میں نظر نہیں آتے تھے
بھارتی اخبار انڈیا ٹوڈے کی رپورٹ کے مطابق اداکار کے اسلام قبول کرنے سے متعلق افواہیں گردش کر رہی تھیں، جبکہ وہ کافی عرصے سے ٹی وی اسکرین سے دور تھے, تاہم اب انہوں نے اسلام قبول کرنے کی تصدیق کر دی ہے
ویویان ڈیسینا نے مقبول ترین ٹی وی ڈراموں میں کام کیا جن میں پیار کی ایک کہانی، جھلک دکھلا جا، شکتی، مدھوبالا اور دیگر شامل ہیں
حال ہی میں بھارتی میڈیا کو انٹرویو دیتے ہوئے انہوں نے بتایا ”میری زندگی میں کچھ زیادہ نہیں بدلا، میں عیسائی پیدا ہوا تھا اور اب میں اسلام کی پیروی کرتا ہوں، میں نے سنہ 2019ع سے مقدس ماہِ رمضان میں اسلام کے مطابق زندگی گزارنا شروع کی“
اداکار کا کہنا تھا ”مجھے دن میں پانچ وقت کی نماز پڑھنے سے بہت سکون ملتا ہے۔ لہٰذا، یہاں میں نے تمام غیر ضروری قیاس آرائیوں کو روک دیا ہے“
ویویان ڈیسینا نے حال ہی میں اپنے مداحوں کو ماہِ رمضان کی مبارک باد بھی دی تھی، انٹرویو کے دوران ویویان ڈیسینا نے بتایا کہ ایک سال قبل ان کی مصر کی ایک سابق صحافی نوران علی سے مصر میں شادی ہوئی تھی اور اب ان کی ایک چار ماہ کی بیٹی بھی ہے
انہوں نے کہا ”باپ بننا ایک خواب کا پورا ہونا اور سب سے شاندار احساس ہے۔ جب بھی میں اپنی بچی کو اپنی بانہوں میں پکڑتا ہوں تو میں دنیا کے اوپر محسوس کرتا ہوں۔ میں اس سے زیادہ کیا مانگ سکتا تھا؟ ہم نے اپنی بیٹی کا نام لیان ویوین ڈیسینا رکھا ہے‘‘
انہوں نے مزید کہا ”میں نے ہمیشہ اس بات کو برقرار رکھا ہے کہ میں اپنی ذاتی اور پیشہ ورانہ زندگی کو الگ رکھنا چاہتا ہوں۔ میں نہیں چاہتا کہ میری فیملی لائم لائٹ میں ہو، اور یہ وہ چیز ہے جو نوران بھی نہیں چاہتی۔ میں اپنے خاندان کی انتہائی حفاظت کرتا ہوں۔‘‘
ویوین نے 2013 میں پہلی شادی کی تھی، لیکن 2016 میں طلاق کے لیے درخواست دائر کی۔
