کراچی – بدھ کی رات کو برطانیہ کے واکریج روڈ سٹیڈیم میں چیلسی اور واٹفورڈ فٹبال کلب کے درمیان میچ شروع ہونے کے صرف چودہ منٹ بعد تقریباً بتیس منٹ کے لیے روک دیا گیا تھا
کھیل روکنے کی وجہ ایک غیر متوقع واقعہ تھا، ہوا کچھ یوں کہ پریمیئر لیگ کے اس میچ کے دوران دونوں ٹیموں کے کھلاڑی کھیل پر توجہ مرکوز کیے ہوئے تھے، کہ اچانک چیلسی کے لیے کھیلنے والے ہسپانوی پلیئر مارکوس آلونسو کو تماشائیوں کے اسٹینڈ میں کچھ گڑبڑ نظر آئی
سوشل میڈیا پر وائرل ہونے والی تصاویر میں دیکھا جاسکتا ہے کہ آلونسو کسی شخص کو تماشائیوں کی طرف انگلی کے اشارے سے کچھ بتا رہے ہیں
کچھ منٹوں بعد معلوم ہوا کہ دراصل اسٹینڈ میں بیٹھے ایک تماشائی کی طبعیت اچانک خراب ہوگئی ہے اور آلونسو کی نظر نے ہزاروں تماشائیوں میں بیٹھے اس شخص کو دیکھ لیا
بعد میں پتا چلا کہ اس تماشائی کو دراصل میچ کے دوران ہارٹ اٹیک ہوا تھا اور آلونسو کے توجہ دلانے پر انہیں بروقت طبی امداد مہیا کردی گئی
اس دوران میچ تقریباً بتیس منٹ رکا رہا اور اس کے بعد واٹفورڈ فٹبال کلب کی جانب سے ایک ٹویٹ میں کہا گیا کہ کھلاڑی گراؤنڈ میں واپس آچکے ہیں اور کھیل دوبارہ شروع کرنے کی تیاری کر رہے ہیں
اس ٹویٹ میں فٹبال کلب کا مزید کہنا تھا کہ اسٹینڈ میں بیٹھے فٹبال ایک تماشائی کی حرکت قلب بند ہوگئی تھی، لیکن اب ان کی حالت بہتر ہے
ٹویٹ میں طبی عملے، کھلاڑیوں اور پرستاروں کے بروقت ردعمل پر شکریہ بھی ادا کیا گیا
چیلیسی کے دفاعی مڈفیلڈر آلونسو اپنی حاضر دماغی اور تیزنظروں کا استعمال کرتے ہوئے فٹبال فین کی جان بچانے کی وجہ سے اس وقت ٹوئٹر پر ٹاپ ٹرینڈز میں سے ایک ہیں
ٹوئٹر پر راف نامی چیلسی کے فین نے لکھا کہ ’مارکوس آلونسو مجمع میں بیٹھے فین کو جسے مدد کی ضرورت تھی اسے تلاش کرنے پر داد کے مستحق ہیں۔‘
نووا نامی ٹوئٹر صارف نے آلونسو کی تعریف کرتے ہوئے لکھا کہ ’مارکوس آلونسو نے آج دل جیت لیے، اس نے ایک انسان کی جان بچائی ہے۔‘
یہ میچ چیلسی نے واٹفورڈ کے ہوم گراؤنڈ میں ایک کے مقابلے میں دو گول سے جیت لیا اور اس وقت پریمیئر لیگ میں دس میچز جیت لینے کے بعد پوائنٹس ٹیبل ہر سرفہرست ہے.
