گوگل کی جانب سے متعارف کرائے گئے ایک نئے فیچر کے بعد اینڈرائڈ فون گم ہو جانے کی صورت میں اب اسے انٹرنیٹ کے بغیر بھی ڈھونڈنا نسبتاً آسان ہو گیا ہے
ٹیکنالوجی کی دنیا سے موصول ہونے والی اطلاعات کے مطابق سرچ انجن گوگل اپنے صارفین کو سہولت کی فراہمی کے لیے ایک بڑا قدم اٹھانے جارہا ہے، جس کے تحت ان کے گمشدہ موبائل کو ڈھونڈنے میں بہت آسانی میسر ہوگی
گوگل کی جانب سے بہت جلد ’فائنڈ مائی ڈیوائس‘ نامی فیچر متعارف کرایا جائے گا جو آف لائن ہونے پر بھی ڈیوائس کو ٹریک کر سکے گا یعنی انٹرنیٹ کنکشن کے بغیر بھی یہ فیچر کارآمد ہوگا
91 موبائلز ڈاٹ کام کی ایک رپورٹ کے مطابق پلے سسٹم دسمبر 2022 کی حالیہ اپ ڈیٹ میں گوگل نے ’فائنڈ مائی ڈیوائس‘ کے نئے فیچر کا اشارہ دیا ہے
خیال رہے کہ گوگل کافی عرصے پہلے ہی ’فائنڈ مائی ڈیوائس ایپ‘ کو متعارف کراچکا ہے یہ سسٹم گمشدہ اینڈرائڈ فون، ٹیبلیٹ یا سمارٹ واچ کو تلاش کرنے میں مدد فراہم کرتا ہے
علاوہ ازیں’فائنڈ مائی ڈیوائس‘ سے فون کو لاک یا اس کا ڈیٹا بھی ڈیلیٹ کیا جا سکتا ہے، تاہم گمشدہ ڈیوائس کو تلاش کرنے کے لیے فون میں انٹرنیٹ کنکشن کی ضرورت ہوتی ہے، مگر اس نئے فیچر سے ’فائنڈ مائی ڈیوائس‘ کی یہ خامی دور کردی جائے گی تاہم ابھی تک یہ واضح نہیں ہو سکا کہ گوگل کا یہ فیچر کب تک صارفین کو دستیاب ہو سکے گا
جہاں تک قبل ازیں متعارف کرائی گئی ’فائنڈ مائی ڈیوائس‘ کو استعمال کرنے کے طریقے کا سوال ہے تو اگر موبائل فون موجود نہیں تو ایپ کی جگہ آپ کمپیوٹر پر ویب براؤزر پر بھی فائنڈ مائی ڈیوائس کو استعمال کر سکتے ہیں
اس کے لیے پہلے android.com/find پر جائیں اور اپنے گوگل اکاؤنٹ سے لاگ ان ہوں، جس پر آپ کے سامنے گوگل میپ جیسی ونڈو اوپن ہوجائے گی
اگر آپ کے پاس ایک سے زیادہ فونز ہیں تو بائیں جانب اوپر ان فونز کے آئیکون بنے نظر آئیں گے۔ ان میں سے گمشدہ فون پر کلک کرنے پر (اگر اس پر انٹرنیٹ کام کررہا ہوا تو) آپ کو علم ہوجائے گا کہ فون کہاں ہے
اگر سسٹم ڈیوائس کو تلاش نہیں کر پاتا تو وہ اس کی آخری لوکیشن کو شو کرے گا۔ وہیں پر آپ کے سامنے فون کو لاک اور ڈیٹا ڈیلیٹ کرنے کے آپشن بھی آجائیں گے
اسی طرح آپ کے سامنے پلے ساؤنڈ کا آپشن بھی ہوگا، جس پر کلک کرنے پر فون پورے پانچ منٹ تک پوری آواز سے رنگ کرے گا چاہے وہ سائیلنٹ موڈ پر ہی کیوں نہ ہو۔
