پشکاش ایرینا، بوداپیسٹ کی رات عجیب تھی۔ آسمان پر کوئی طوفان نہیں تھا، لیکن یورپی فٹبال کے دو خواب ایک دوسرے سے ٹکرانے والے تھے۔ ایک طرف وہ آرسنل تھا جو بیس برس بعد چیمپئنز لیگ کے فائنل میں پہنچا تھا اور اپنی تاریخ کا پہلا یورپی تاج جیتنے کے دروازے پر کھڑا تھا۔ دوسری جانب پیرس سینٹ جرمین تھا، جو گزشتہ برس کا فاتح ہونے کے ساتھ ساتھ اپنی برتری کو روایت میں بدلنے نکلا تھا۔
میچ کے آغاز سے پہلے تمام گفتگو عثمان ڈیمبیلے، خویچا کواراتسخیلیا، ڈیکلن رائس اور مارٹن اوڈیگارڈ کے گرد گھوم رہی تھی، لیکن فٹبال اکثر اسکرپٹ نہیں پڑھتی۔
فائنل کا ٹاکرا شروع ہوئے ابھی صرف چھ منٹ ہی گزرے تھے کہ آرسنل نے ایسا وار کیا جس نے پورے اسٹیڈیم کو ساکت کر دیا۔ ایک منتشر گیند کائی ہیورٹز تک پہنچی، اور جرمن فارورڈ نے بائیں جانب سے آگے بڑھتے ہوئے ایسا شاٹ لگایا جو پی سی جی کے گول کیپر ماتوے سفونوف کے لیے محض ایک منظر بن کر رہ گیا۔ گیند جال میں تھی، آرسنل آگے تھا، اور لندن کے سرخ حصے کو محسوس ہونے لگا کہ شاید تاریخ واقعی بدلنے والی ہے۔ لیکن اس گول کے بعد میچ نے اپنا رنگ بدل لیا۔
آرسنل نے دفاعی خول اوڑھ لیا۔ مائیکل آرتیتا کی ٹیم نے میدان کو تنگ کر دیا، پاسنگ لینز بند کر دیں اور پی ایس جی کو گیند تو دے دی، لیکن راستے نہیں دیے۔ پیرس کے کھلاڑی گیند کے مالک تھے، لیکن جگہ کے نہیں۔ ایسا لگ رہا تھا کہ وہ ہ خالی پلیٹ میں چمچ گھما رہے ہوں۔ ویٹینیا، ژواو نیویس اور ڈیمبیلے مسلسل راستہ تلاش کرتے رہے، جبکہ آرسنل کی دفاعی لائن ہر حملے کو ایک نئی دیوار میں بدل دیتی رہی۔ کئی مبصرین نے بعد میں نشاندہی کی کہ آرسنل نے فائنل کا بیشتر حصہ انتہائی کم پوزیشن کے ساتھ گزارا، لیکن ان کی دفاعی تنظیم غیر معمولی رہی۔
پہلا ہاف ختم ہوا تو اسکور بورڈ آرسنل کے حق میں تھا، لیکن کھیل کی دھڑکن پی ایس جی کے قبضے میں آ چکی تھی۔
دوسرے ہاف میں پیرس نے دباؤ کی شدت بڑھا دی۔ کواراتسخیلیا بار بار بائیں جانب سے اندر آتے رہے اور بالآخر پینسٹھویں منٹ کے قریب وہ لمحہ آیا جس نے میچ کا رخ بدل دیا۔ کرسچیان موسکیرا کی ٹانگ کواراتسخیلیا کے راستے میں آئی، ریفری نے پنالٹی پوائنٹ کی طرف اشارہ کیا، اور عثمان ڈیمبیلے نے اعصاب شکن ماحول میں گیند کو جال تک پہنچا دیا۔ ایک گھنٹے سے زائد عرصے تک قائم رہنے والی آرسنل کی برتری ختم ہو چکی تھی۔ اور میچ اب دوبارہ شروع ہو چکا تھا۔
برابری کے بعد دونوں ٹیموں کے رویے میں ایک محتاط سنجیدگی آ گئی۔ ایسا لگ رہا تھا جیسے ہر کھلاڑی جانتا ہو کہ ایک غلط پاس، ایک غلط ٹچ یا ایک لمحے کی غفلت پورے سیزن کی محنت پر پانی پھیر سکتی ہے۔ پی ایس جی گیند کے ساتھ آگے بڑھتا رہا، جبکہ آرسنل وقفے وقفے سے جوابی حملوں کی کوشش کرتا رہا۔ لیکن فائنل کے اعصاب اکثر تخلیقی صلاحیتوں کو محدود کر دیتے ہیں، اور یہی یہاں بھی ہوا۔
اضافی وقت میں تھکن نمایاں تھی۔ ٹانگیں بھاری ہو چکی تھیں، دوڑیں مختصر ہو رہی تھیں اور ہر ٹیکل کے بعد کھلاڑی چند لمحے زمین پر رکتے دکھائی دیتے تھے۔ آرتیتا اور لوئس اینریکے دونوں نے اپنے بینچ استعمال کیے، لیکن کوئی بھی فیصلہ کن ضرب نہ لگا سکا۔
پھر وہ مرحلہ آیا جسے فٹبال کی سب سے بڑی بے رحمی کہا جاتا ہے: پنالٹی شوٹ آؤٹ۔ اور پشکاش ایرینا میں ہزاروں سانسیں رک گئیں۔
پہلے چند شاٹس کے بعد مقابلہ برابر چلتا رہا۔ گول کیپرز نے ذہنی جنگ لڑی، کھلاڑیوں نے نظریں چرائیں، شور بلند ہوتا گیا۔ پھر دباؤ آرسنل کے کندھوں پر منتقل ہو گیا۔ صورت حال کچھ یوں تھی کہ پی ایس جی اپنے پانچ پینالٹیز میں سے چار گول داغ چکا تھا اور آرسنل چار پینالٹیز پر تین گول۔ آخری پینالٹی روکنے یا ضائع ہونے کی صورت میں بیس سال بعد فائنل میں پہنچنے والی آرسنل کا خواب چکنا چور ہو سکتا تھا۔
اس لمحے آخری پینالٹی کے لیے آرسنل کے گیبریل اپنی باری پر آئے۔ ان کے سامنے صرف گیند، گول پوسٹ اور تاریخ تھی۔ لیکن شاٹ بلند گیا۔ بہت بلند۔
گیند کراس بار کے اوپر سے گزر گئی اور اسی لمحے پی ایس جی کے کھلاڑی میدان میں دوڑ پڑے۔ پیرس سینٹ جرمین نے پنالٹیز پر تین کے مقابلے میں چار گول سے کامیابی حاصل کر لی تھی۔ مسلسل دوسری مرتبہ یورپ کا تاج ان کے سر پر تھا، اور وہ چیمپئنز لیگ کے جدید دور میں ٹائٹل برقرار رکھنے والی پہلی ٹیموں میں شامل ہو گئے۔
مارکوئنہوس نے ٹرافی بلند کی تو پیرس کے کھلاڑی جشن میں گم تھے، جبکہ آرسنل کے چہروں پر وہ خاموشی تھی جو صرف فائنل ہارنے والے سمجھ سکتے ہیں۔ یہ شکست عام شکست نہیں تھی۔ آرسنل صرف ایک کِک کے فاصلے پر تھا۔ صرف ایک لمحے کے فاصلے پر۔
اس رات بوداپیسٹ نے دو کہانیاں دیکھیں۔ ایک کہانی پی ایس جی کی تھی، جس نے ثابت کیا کہ گزشتہ برس کی کامیابی اتفاق نہیں تھی بلکہ ایک منصوبہ، ایک نظام اور ایک تسلسل تھا۔ لوئس اینریکے کی ٹیم نے ایک بار پھر یورپ پر اپنی مہر ثبت کر دی۔
دوسری کہانی آرسنل کی تھی۔ ایک ایسی ٹیم جو ٹرافی نہیں جیت سکی، لیکن بیس سال بعد یورپ کے سب سے بڑے اسٹیج پر واپس آئی، مقابلہ کیا، مزاحمت کی اور آخری لمحے تک خواب کو زندہ رکھا۔ شاید یہی وجہ ہے کہ بعض شکستیں بھی مستقبل کے لیے امید چھوڑ جاتی ہیں۔
________________________
